Gibutyag ni Engineer Gerald Faciol, ang division chief sa planning division sa Sarangani Provincial Engineering Office, nga nag-una gayung prayoridad ni Governor Steve Chiongbian Solon ilalum sa iyang Sulong Sarangani flagship program pagsugod atong tuig 2013, ang pagpasemento sa mga provincial road og farm-to-market road sa entiro Sarangani Province.
Aminado ang nasangpit nga engineer nga dako ang hagit kaniadtong tuig 1992 sa pag-separar sa Sarangani gikan sa probinsya sa South Cotabato hilabi na matud pa sa hisgutanang kadalanan. Sa kinatibuk-ang 350 kilometros kapin nga provincial road tibuok Sarangani, otso porsyento (8%) lang matud pa ang napasemento sa nanglabay nga mga katuigan apan karon ang anaa na kini sa halos singkwenta porsyento (50%), og ilang gilauman nga mu-sobra pa sa setentay-singko porsyento (75%) ang masemento human sa tulo pa katuig nga pangatungdanan ni Governor Solon.
Dili tiaw ang magasto sa pagpasemento sa dalan tungod kay ang usa (1) ka kilometro ang mugasto pud kinig sobra Dyes Milyones ka pesos (P10M). Apan kini ang gipaningkamutan sa gobernador tungod kay una na niining gibarugan nga kinahanglang ablihan ang kabukiran aron makasulod ang kalambuan og ang serbisyo sa gobyerno, sa pag-ayuda sa mga partner national government agencies sama sa Department of Agriculture, DILG, DPWH, og World Bank, pribadong sektor, mga charity organization, og nila Pangulong Rodrigo Duterte, Senador Manny Pacquiao, Congressman Ruel Pacquiao, Vice Governor Elmer De Peralta, tanang board member og mga mayores.
