Gikondena ni Misamis Oriental Governor Bambi Emano ang walay puangod, walay hinungdan, walay kasing-kasing ug walay konsiyensyang mga pagpamomba sulod ug gawas sa Mt. Carmel Cathedral sa Jolo, Sulu kagahapong adlawa.
Matud sa Gobernador nga dili na unta kinahanglan pang adunay kinabuhing makalas ug propredad nga maangin aron lamang mapaabot sa mga suspek ang ilang mga pagmahay sa gobyerno.
Ang pagpamomba miresulta sa pagkamatay sa 27 ka tawo ug pagkaangol sa daghang sibilyan.
Dugang pa ni Gobernador Emano nga dili tawo ang naghimo sa maong pagsakripisyo sa kinabuhi sa mga inosente tungod lamang sa kaugalingong interes.
Nanghinaut usab kini nga unta mailhan, mataral sa hukmanan ug masilotan ang mga responsable sa pag-atake aron sa ingon mahatagan og hustisya ang kamatayon sa mga biktima.
