General Santos City–Gikabutyag ni Police Major Ananias Vasquez, hepe sa Makar Police Station nga posibleng personal grudge ang usa sa motibo nga ilang ginasundan karun sa pagpusil sa miyembro sa Phil.Navy nga nakabase sa Maitum, Sarangani Province nga si Sgt.Eden Simbulan,37 anyos ,nanimuyo sa Lower Makar, Barangay Labangal Gensan kansa gipusil sa wala pa mailhing mga suspek kung asa nadamay pa ang asawa niini nga si Beth Simbulan.
Sumala pa ni Vasquez nga nagpadayon gihapon ang ilang imbestigasyon bisan pa man duna silay nakuhang impormasyon nga dunay nakalalis ang biktima nga mga tawo dihang nakabase pa kini sa Balut Island.
Kahibaloan nga una ng gipusil ang nasampit niadtong adlaw’ng Biyernes sa hapon sa Makar Hi-Way samtang sakay sa iyang sakyanan uban ang asawa niini asa nakaangkon ug igo pinusilan sa iyang abaga, samtang natapsingan usab ang asawa niini sa ubos nga bahin sa dughan.
Dugang pamahayag ni Major Vasquez nga dili lang sila mututok sa ilang imbestigasyon sa nahitabong insidente sa biktima didto sa Balut Island kundili gikonsidera nila ang uban pang motibo nga basin dunay gayuy nasuko sa nasampit.
Matud pa sa opisyal nga wala pa silay matumbok nga person of interest sa panghitabo ug padayon pa silang nagapangalap ug impormasyon sa posibleng makatabang sa pagresolba sa kaso.
Saysay pa ni Vasquez nga anaa na sa maayong kondisyon ang mag-asawa nga pabiling nag-paalim sulod sa balay tambalanan. (Reynald Timario)
