General Santos City–Padayon ang ginahimong imbistigasyon karon sa Police Station 1 kabahin na sa pagkawala sa usa ka motorsiklo sa biktima nga si Macapagal Pangotan, 18 anyos, estudyante ug nanimuyo sa prk. Darusalam, Barangay San Isidro ning syudad human nga gi-park sa Santol Street, Barangay North , alas 11:00 ang takna sa gabie.
Sumala pa ni Police Captain Abdulsalam Mamalinta, ang hepe sa Police Station 1 nga basi sa ilang nahimong imbistigasyon, gibiin sa nasangpit nga biktima ang iyahang motor nga wala nakasecure ug headlock ingon man bisan unsa nga susi ang mamahimong gamiton aron nga mapa andar kini.
Sa karon gina paabot nalang matud pa sa kapulisan ang CCTV footage sa establishsmento nga anaa sa maong lugar aron nga makita kung kinsa ang mga suspect nga mitangag sa maong motorsiklo.
Gipaklaro usab ni Capt. Mamalinta nga bisan paman ug gilayon nila nga na flash alarm sa ubang unit sa kapulisan ang motor wala gihapon kini na recover tungod kay mag duha na ka oras nga nawala ang motor ayha nareport hinungdan nga posibleng layo na ang na-abtan niini gikan sa Oval Plaza. (Dave Silagan)
