General Santos City–Dugay na matud pa nga ginamonitor sa City Police Drug Enforcement Unit kon CPDEU ang Traffic Enforcer nga si Joel Cortez Torado, 33 anyos, nga taga Barangay Fatima ning syudad nga naga-payuhotan ug iligal nga droga ayha nila hipahigayunan ug buy-bust operation niadtong milabay nga adlaw sa Ramos Street, Prk. Lapu-lapu, Barangay Dadiangas East.
Sumala pa Ni Police Major Ruelito Lumiguid ang labaw sa CPDEU nga hapit usab mag bulan nila nga ginasundan ang nasnagpit nga suspect human nga nabutang ang pangalan niini sa ilahang watchlist sa mga lambigit sa iligal nga droga.
Dugang pa niini nga adunay duha ka mga area ang ginabaligyaan sa suspect mao kini ang block 3, Barangay City Heights ug sa Lapu-Lapu, Barangay East kung asa kini nasikop sa kapulisan.
Napalit matud pa ug usa ka sachet sa gikatahapng shabu ang suspect ug nakuha sa iyahang posisyon ang 500 pesos nga mark money, gi-andam naman usab karon sa kapulisan ang kasong pag supak sa RA 9165, kon pag pamaligya ug iligal nga droga batok sa nasangpit nga suspect.
Hugot man usab nga gipanghimakak ni Joel Torado ang aligasyon batok kaniya nga siya naglambigit sa pagpamaligya ug iligal nga droga.
Sumala pa sa nahisgutan nga nakurat nalang kini sa dihang paggawas niini sa usa ka lugar sa Lapu-Lapu gidakop lang kinig kalit sa kapulisan tungod kay namaligya daw kini.
Gihingusgan man usab sa nasangpit nga gi-frame up lang siya sa asset sa mga pulis tungod kay nasuko matud pa kini sa iyaha tungod sa ilahang transaksyon sa pag pa-renew ug sakyanan ug lisensya. (Dave Silagan)
