Imbestigahan sa Committee on Education sa City Council ang nahitabo nga pagpangrecruit sa wala mailang suspect sa kapin kon kulang 60 ka mga High school students sa Iponan National High School nga nahitabo niadtong Biyernes sa milabayng semana.
Mao kini ang gibutyag ni Councilor Suzette Magtajas Daba nga Chairman sa Committee on Education sa city council.
Matud ni Daba nga iyang ipatawag sa iyang Committee ang Principal ug mga Public School Teachers sa Iponan National High School, mga ginikanan sa mga student victims ug ang mismo mga estudyante nga biktima sa maong pag-pang-recruit.
Gibutyag ni Daba nga ang tumong ug tuyo sa iyang Committee Investigation, in aid of legislation.
Gusto usab ni Daba nga masuta sa iyang committee kon unsa ka higpit ang seguridad sa Iponan National High School nga nalusotan sa mga suspitsadong illegal recruiter.
Matud ni Daba nga isip siya ang chairman sa Committee on Education na-alarma siya sa maong hitabo kay mga bata ang polos biktima sa maong pag-pang-recruit.
Sigon sa report nga nadawat ni Daba, ang maong mga esyudyante, gipasakay sa pito ka puting Van ug gidala sa Butig Lanao del Sur.
Una nang gireport ni Police Major Evan Viñas nga Spokesman sa COCPO nga ang maong mga estudyante gipa-rehistro sa mga suspect sa Butig, isip mga flying voters.
Matud ni Daba nga iya usab nga i-summon ang mga officials sa kapolisan ning syudad aron makuha sa iyang committee, unsa nay status sa imbestigasyon sa kapolisan sa maong insidente.
