*Padayon pa karong giimbistigahan sa kapolisan sa Puerto Police Station ang hinungdan sa pagtigbas patay sa 28 anyos nga si John Mark Labial Cuaco nga taga-Relocation Site, Brgy. Balubal ning dakbayan.*
*Gibutyag ni Police Chief Insp. Ian Borinaga, ang hepe sa Puerto Police Station nga nagpadayong nagtago-tago ning panahona ang 23 anyos nga suspek nga si Ariel Pabiano Jaclag kinsa nagpuyo gihapon sa maong barangay ug kaila ra sa biktima. *
*Gipahayag usab ni Brgy. Balubal Kapitan Vivian Malingin, nga basi sa sumbong kanila sa higala sa biktima kinsa mao usab ang nakakita sa panghitabo, nga miadto silang duha sa balay sa suspek niadtong Martes.*
*Apan human sa pipila ka minutos nga panagsulti, kalit matud pang misulod sa balay ang suspek ug paggawas dala na niini ang sanggot ug dayong tigbas kang John Mark.*
*Tungod niini, natigbasan ang abaga sa biktima duol sa liog apan nakadagan pa kini hinungdang gilakag sa suspek ug subling gitigbas.*
*Dugang pa ni Kapitan Malingin, nga human makita sa amigo ni John Mark ang gihimo sa suspek miuna matud pa kini sa pagdagan tungod sa kahadlok nga malakip.*
*Wala pa usab masulti kanila sa higala sa biktima ang hinungdan sa pagpanigbas sa suspek ug kung unsay ilang tuyo ug giistoryahan sa duha, sa pag-adto nila sa pinuy-anan niini niadtong Martes kon nganong misangpot man kini sa pagpanigbas.*
*Gani niadtong Martes sa gabii, giadtoan pa sa mga barangay tanod ang dapit nga nahimutangan sa biktima human usab misumbong kanila ang nakasibat nga higala ni John Mark.*
*Apan gumikan sa kangitngit sa maong dapit hinungdang wala kini makita, busa gibalikan nila kini kagahapong adlawa ug nakuha ang patayng lawas sa biktima mga alas tres na sa hapon. *
*By: Kasamang Ellah Baculio*
