Gitun-an karon sa mga abogado sa Union of Peoples Lawyers in Mindanao kon UPLM ang paghimog written complaint aron ilang pasakaan sa kaso ang mga opisyal sa Misamis Oriental Provincial Government.
Kini human gi-demolish sa mga elemento sa Misamis Oriental Provincial Engineers office niadtong Martes ang kapin sa 30 ka mga barong-barong sa Public Plaza sa kapitolyo nga maoy gipuy-an sa kapin 140 ka mga bakwit, lakip mga bata, nga pulos taga Sitio Mincamansi, Barangay Banglay, Lagonglong, Misamis Oriental.
Matud ni Atty. Czarina Musni, miyembro sa UPLM nga ila usab nga gipangayo ang tabang sa mga abogado gikan sa Free Legal Assistant Group kon FLAG aron maghiusa sila sa pagtoon sa paghimog written compliant aron pagpasaka sa kaso batok nilang Misamis Oriental Governor Yevgeny Bambi Emano ug Provincial Legal officer Atty. Cerilio Neil Pacana.
“Duna gyoy action nga among himoon, dili puwedi wala” matud ni Musni.
Matud ni Musni nga makalaom si Governor Emano ug Pacana nga mag-atubang sila sa kasong violation sa Human rights sa buhatan sa Commission on Human Rights kon CHR.
“Mahimo sab nga didto namo sila i-sumbong sa Ombudsman kay mga public officials man sila” matud ni Musni.
Matud ni Musni nga dako ang tulobagon ni Governor Emano ug Pacana sa ilang pagdemolish sa mga barong-barong nga gipuy-an sa mga bakwit sa kapitolyo.
“Mga displace person ni sila, obligasyon sa gobyerno nga mahatagan silag poy-anan bisan temporary lang, unya ila na hinoong gi-demolish” matud ni Musni.
Gibutyag ni Musni nga kon gihatag pa lang unta sa gobyerno ang gipangayo sa mga lumad nga i pull-out ang mga sundalo nga nagkampo sa Sitio Mincamansi, ang mga bakwit sa kapitolyo dugay ra unta mibalik sa ilang komunidad didto sa barangay Banglay.
“Dili gyud unta sila gahanan magpuyo dinhi sa syudad kay wala na sila maanad dinhi, pero wala man ihatag sa gobyerno ang ilang gipangayo nga I pull-out ang mga sundalo didto sa ilang lugar, mao nang nag-antos sila pagpuyo diha sa kapitolyo” matud ni Musni.
Sa iyang kabahin.
Gipahayag ni Misamis Oriental Board Member Gerardo Sabal nga ang gipangayo sa mga Bakwit dili mahatag ni Governor Emano.
Kay matud ni Sabal nga wala na sa gahom ni Emano isip gobernador ang pagpapahawa sa mga sundalo nga naghimog detachment sa Sitio Mincamansi sa Barangay Banglay.
Kay matud ni Sabal nga ang gahom sa pagpapahawa sa mga sundalo sa Bbarangay Banglay, iya ra kini nga decision sa Militar ug ni Presidente Duterte.
“Dili namo sila masabtan, nalibog kami kanila, imbis ang sundalo maoy mohatag protection kanila, ila na hinoong ipapahawa” matud ni Sabal.
Gipasabot ni Sabal nga sulod sa kapin usa ka tuig sa pagpuyo sa mga bakwit sa kapitolyo, wala magkulang paghatag sa tabang si Governor Emano.
Matud ni Sabal nga kon wala pa lang unta maghimog illegal structures ang mga bakwit sa kapitolyo, dili unta sila ipa-demolish sa provincial government.
“Wala man sab sila motuman sa sabot, mao nang na-demolish sila kay illegal structures na man kadtong ilang gihimo” matud ni Sabal.
