BACOLOD CITY – Nakahimo na sang isa ka “amicable settlement” sa tunga sang PhilHealth kag sang Bacolod Our Lady of Mercy Specialty Hospital angut sa kumplikto sang duha nga magaresulta sang pagpasira sang amo nga ospital.
Ini matapos nga ginpulong kahapon ni Bacolod City Mayor Evelio Bing Leonardia ang magtimbang nga bahin agud nga ma-hitso ang kumplikto sa amo nga kaso kon diin ginakabalak-an nga madamo ang maapektuhan sini kon madayon ang closure.
Nag-attend sa bahin sang Philhealth ang ila regional vice president for Western Visayas nga si Lourdes Diocson samtang nagtambong sa bahin sang BOLMSH ang ila presidente nga si Dr. Nestor Amante.
Nadesisyunan man sa amo nga meeting, magapadayon ang pag-operate sang hospital tubtob sa Hulyo 30 samtang padayon nga gina-resolve ang issue.
Suno sa Philhealth, nga ila padasigun nga ma-proseso ang accreditation sang Our Lady of Mercy Hospital sa ti-on nga mag-file sila sang motion for reconsideration kag ila wala nabayran sa ospital nga mga P35M.
Angut sini, gin-pasalamatan naman ni Dr. Amante si Mayor Bing Leornadia bangud nga naka-himo sila sang win-win solution.
Bangod sini balik na sa normal ang operation sang ospital sa diin makabaton na sila sang mga bag-o nga pasyente.
Kon nadayon ang pagsarado, mga 400 ka mga empleyado ang madulaan sang trabaho wala pa labot dira ang mga janitors kag mga security guards.
Nagkahangawa man ang 381 ka mga dialysis patients nga padayon ang medication sa ospital. /dyHB BACOLOD
