Gikonsiderar nga sirado na nga kaso ang pagpusil patay sa usa ka bana sa iyang asawa sa San Roque Parish church sa Catarman, Camiguin Province.
Matud ni Police Chief Inspector Erwin Naelga, Chief of Police sa Catarman Municipal Police Station nga nahitabo ang insidente samtang gipahigayon ang misa alas 8:35 kagahapon sa buntag, adlawng Dominggo.
Dugang pa ni Police Chief Inspector Naelga nga naila ang bana nga si Celmar Linao, 37 anyos, taga Barangay Compol, Catarman, Camiguin samtang naila ang asawa nga si Ivy Dunay Linao, 35 anyos.
Nasayran nga sige na og balik balik ang asawa sa ilang buhatan aron nga mangayo og tabang tungod kay dili sila magkasinabot sa iyang bana tungod sa selos.
Naangkon sa asawa ang samad sa dughan ug likod nga maoy hinungdan sa iyang kamatayon.
Samtang nagpusil sa ulo ang bana human niini gipusil ang asawa sa simbahan sa Catarman.
Gibutyag ni Police Chief Inspector Naelga nga gisulayan pa og dala ang biktima sa hospital apan gideklara na kining dead on arrival.
Dugang pa ni Naelga nga unom ka bata ang nabiyaan sa magtiayong Linao.
