Gikaguol ni Catarman Municipal Mayor Nestor Jacot ang pagkamatay sa iyang empleyado kagahapon sa buntag.
Kini human gipusil sa iyang bana ang biktimang si Ivy Dunay Linao, 35 anyos ug taga Poblacion, Catarman, Camiguin.
Samtang ang suspect nga bana nga si Celmar Linao, 37 anyos, kanhi OFW ang naghikog usab pinaagi sa pagpusil sa iyang kaugalingon.
Nasayran nga daling midalikyat sa Catarman District Hospital ang mayor human nasayran ang maong panghitabo kagahapong adlawa.
Matud ni Mayor Jacot nga sa karon iyang gibutang sa Catarman Municipal Gym ang patayng lawas sa suspect samtang gihulat ang pamilya nga gikan pa sa Davao City.
Giklaro usab sa mayor nga 13 ka tuig si Ivy nga nag-antos sa gihimong pagpanakit sa iyang bana, pagpanion sa armas, kutsilyo ug uban pa.
Niadtong bulan sa Disyembre lamang nakahukom ang biktima nga dili na mobalik sa iyang bana tungod sa naagiang pagpanakit sa iyang bana nga dili na niini maantus.
Gibutyag ni Mayor Jacot nga una nang nigawas ang mga bahad nga manabla na lamang matud pa ang bana kung dili makigbalik ang iyang asawa.
Gikasakit usab sa mayor ang nanggawas nga balita nga ang asawa na hinoon ang dunay lalaki nga unta ang bana man ang dugay nang gahimo sa pagpangabit.
Gidugang ni Mayor Jacot nga sa impormasyon nga iyang nakuha, naka-inom ang suspect sa wala pa niini gipusil ang iyang asawa sulod sa simbahan.
