Ginpatpat ni Bacolod City Legal Officer Joselito Bayatan ang matabo sa ciudad sumugod sa Hunyo 1 sa diin ipaidalom na ini sa Modified General Community Quarantine (MGCQ) santo sa Resolution Number 40 sang National Inter-Agency Task Force (NIATF).
Sumugod sa Lunes suno kay Bayatan, full capacity na ang operasyon sang mga government offices apang ang mga empleyado nga naga-edad sang 60-anyos ang pwedi hatagan sang espesyal nga work arrangements.
Wala na sang ipatuman nga home quarantine kag pwedi na makaguwa ang tanan nga residente apang ang mga naga-edad 60-pasaka kag may balatian, ang gina-advice nga kun mahimo magtiner lang anay sa ila tagsa ka puluy-an.
Maka-operate naman ang mga hotels kag inns, kag pwedi na ang dine-in sa restaurants apang dapat 50% lang sang kapasidad sini ang pahanugutan nga makasulod pareho sa theater kag movie houses, parlor kag salons.
Ang mga malls, dapat nga yara lang sa 25°C ang temperature kag ipatuman man ang 1 person for every 2 square meters capacity. Regulated man ang hulag sa mga public markets kag 50% lang sang kapasidad sini ang pasudlon nga tawo.
Dulaon naman ang odd-even scheme sa mga salakyan nga nagasulod sa Bacolod apang suno kay Atty. Bayatan, plano nila magdihon sang kasugtanan sa mga local government units sa probinsiya sang Negros Occidental nga essential travels lang anay pahanugutan kag indi ang lagaw ukon bakasyon.
Pahanugutan naman ang byahe sang bus gikan sa Bacolod pakadto sa Negros Oriental, samtang ang mga religious gatherings ang limitado sa gihapon sa 10 ka persona ang ginapahanugutan nga makatambong.
[image: image.png]
