BACOLOD CITY – (Update) Ginalantaw na lamang sa positibo nga pamaagi sang pamilya sang ginpatay nga si Brgy. 16 Punong Barangay Nelson “Jun-jun” Ligaya, Jr. ang natabo sa iya sadtong Sabado sang gab-i sa Brgy. 16, Bacolod City.
Sa interview sang DYHB sa kamagulangan nga anak ni Kapitan Ligaya nga si Jason, 27 anyos, iya ginsiling nga nagapati sila nga may daku nga purpose ang Ginoo sa tanan kag tandugon Niya ang konsiyensya sang may kahimuan sini agud magsungka.
Si Ligaya ang gintiro may mga las 9:40 sang gab-i sadtong Sabado sang 4 ka mga suspek nga nagasakay sa motorsiklo, naka helmet kag may tabon ang nawong.
Sa 5 tubtub 6 ka lupok, duha diri ang nag-igo sa lawas sang punong barangay nga amo ang gintunaan sang iya kamatayon.
Suno kay Jason nga halos indi niya mapaathag ang natabo sa iya amay bangud wala gid ini sang gamo nga klase sang tawo, wala sang kontra kag maluluy-on pa sa iya isigkatawo.
Indi nya man matumod kon anu gid ang motibo kaangay sang ginasiling druga bangod wala man ini sang nahibaluan angot dira. Pigado man sila kag wala gani mga unod gamit ang ila balay bangod nga ang para sa ila kaisa, ginahatag nya pa sa tawo.
Isa man sa ginalantaw nila nga basi may angot man ini sa ginpadakop sang Kapitan nga isa ka drug personality sa iya barangay.
Una na nagpaguwa ang Bacolod City Police Office (BCPO) nga posibli utang ang isa sa mga anggulo nga ila ginalantaw sa kremin.
Sa pihak nga bahin, naga-bakho man sa karon ang mga constituents ni Ligaya sa Brgy. 16, kalabanan sini sa ila ang halos indi makapati kag nagakanugon sa pagkadula sang isa ka maalwan kag maayo nga sahi sang barangay kapitan./dyHB BACOLOD
