HINOBA-AN – Relocation site para sa mga pamilya nga maapektuhan sang Tsuneishi Heavy Industries ship building facility padayon nga ginaobra.
Una nga 30 ka mga pamilya ang magatransfer na sa Relocation Site nga gintan-ay sang Provincial Government sang Negros Occidental para sa mga maapektuhan sang pagatukuron nga shipbuilding facility sa 282 ektarya nga duta nga nahamtang sa Brgy. Bacuyangan.
Ginpahayag ni Mayor Ernesto Estrao nga 247 ka mga pamilya ang maapektuhan kag ipangsaylo sa relocation site nga nahamtang sa Zone 10, Brgy. Bacuyangan.
Sa 247 ka pamilya 150 na dire ang nagpirma sang kontrata nga magasaylo apang may 21 naman ka mga pamilya ang nagapakatig-a pa nga maghalin sa lugar kun sa diin ipahamtang ang Tsuneishi Heavy Industries nga magapatindog sang P300 milyones dolyares nga shipbuilding facility.
Suno kay Estrao iya ginapahangop sa mga pumuluyo kun ano ka importante ang pagtukod sang shipbuilding facilty bangud makahatag ini sang kapin P10 mil ka mga trabaho sa mga Hinobaanon kag ang una nga prayuridad amo ang mga iga relocate.
Dugang pa sang alkalde nga paagi sini mabuligan sang dako nga magtin-ad ang banwa kag indi lamang lunsay mga taga Hinoba-an ang mahatagan sang trabaho kundi lakip na ang mga pumuluyo sang mga kaiping nga kabanwahanan kag syudad.
Ang mga pamilya nga maapektuhan kag igasaylo sa relocation site ang magabaton sang P45 mil pesos cash kag 150 square meters nga duta kun sa diin igapahamtang ang ila mga puluy-an kag ini libre.
Magluwas sini pagahatagan pa gid ang myembro sang pamilya sang libre nga training sa TESDA agud nga makatrabaho pananglitan mapatindog na ang shipbuilding facility.
