Pamunuan sang DILG 12 ginkumpirmar nga wala sang barangay kapitan sa rehiyon nga nalakip sa ginsuspindir sa SAP Tranche 1 anomalies.

21

Wala sang bisan isa ka barangay kapitan sa rehiyon dose ang nalakip sa listahan sang mga barangay opisyal nga ginapasuspindir sang anum ka bulan sang Office of the Ombudsman tungod sa anomalya sa distribution sang Social Amelioration Program ukon SAP.
Ini mismo ang ginkumpirmar ni Department of Interior and Local Government Regional Director Josephine Leysa, matapos nga base sa datos sang Secretary sang DILG yara sa 89 ka mga punong barangays sa pungsod ang nasuspindir tungod sa anomalya kag iregularidad sa implementasyon sang first tranche sang Social Amelioration Program (SAP).
Suno kay RD Leysa ang mass suspension ang pinakauna nga natabo sa kasaysayan sang pungsod kag nagapati siya nga ginahimo lang sang DILG ang promisa nga limpyohan ang burukrasiya kag tapnaun ang mga kurakot nga opisyal nga nagpangbentaha sa implementasyon sang SAP.
May-angot sini, hugot naman ang pagpasalamat ni RD Leysa sa tanan nga mga field officers sang ahensya kag local chief executives nga nag-alalay sa mga punong barangays nga masiguro nga tama ang distribusyon sang SAP.
Paklaro pa sang regional director nga matuod nga may mga reports angot sa ginaaligar anomalya sa distribusyon sang SAP sa rehiyon, apang base sa maid-id nga imbestigasyon ang gilayon man nga naaksyunan kag tama man ang nangin distribusyon.
Madumduman nga nagmando ang pamunuan sang DILG sa PNP-CIDG nga magfile sang criminal cases batok sa 447 individuals sa pagbayolar sa RA 3019 (Anti-Graft and Corrupt Practices Act), RA 11469 (Bayanihan Act I), kag RA 6713 (Code of Conduct of Government Officials and Employees) kag iban pa angot sa implementasyon sang Social Amelioration.
Base sa datos sa 447 suspects, 211 ang elected local kag barangay officials, 104 ang appointed barangay officials kag 132 ang sibilyan nga kakonsabo nga ang kaso ang yara na sa tagsa sini ka city kag provincial prosecutors.


Facebook Comments