Soccksargen nagakinahanglan sang masobra 1,500 COVID-19 contact tracers.

14

Nagakinahanglan sang 1,500 COVID-19 contact tracers ang Soccksargen, suno kay DILG 12 Regional Director Josephine Leysa.
May-angot sini, nagabaton na sang aplikasyon ang DILG 12 sa mga luyag mangin contact tracer kadungan sang pagtaas sang local transmission sang COVID-19 Cases sa rehiyon.
Suno kay RD Leysa kinahanglan ang mga aplikante ang may-yara sang Bachelor’s degree kag maayo kon nakatapos ang mga ini sang nursing, graduate ukon undergraduate sang medical course.
Kinahanglan man nga ang Contact tracer ang may-yara sang ihibalo sa data gathering kag research documentation, may kapasidad nga mag-interview sa COVID-19 cases kag close contacts para makuha ang travel history kag makapatigayon sang health assessment.
Ginhatagan man punto ni Leysa nga importante man sa mga contact tracer ang investigative capability.
Apang ginpaklaro niya nga indi requirement sa mga luyag mangin contact tracer ang eligibility tungod ipaidalom man ang mga ini sa training sang DILG kag local government academy.
Dugang pa ni RD Leysa nga ang mga contact tracer ang magaserbi nga myembro sang Contact Tracing Teams ukon CCT sa sulod sang apat ka bulan.
Suno kay Leysa magluwas sa mga contract of service personnel sang DILG nga wala na-renew ang kontrata tungod sa budget re-alignment tuga sang COVID 19, prayoridad man nila ang mga returning OFWs nga nawad-an sang trabaho, subong man ang mga trabahante nga naterminate sang ila mga kompanya, parent leaders sang 4Ps, pati naman ang dati nila nga mga volunteer.
Paklaro pa sang opisyal nga ang kadamuon sang contact tracer nga ibutang sa isa ka lugar ang nakadepende man sa ila nga populasyon.
May-angot sini, ang mga aplikante ang kinahanglan lamang nga magsubmitir sang letter of intent kag Personal Date Sheet ukon Resume, Police Clearance sa mga nagahulat sang NBI Clearance kag drug test result sa pinakamalapit nga talatapan sang DILG.


Facebook Comments