BACOLOD CITY – Nagpa-blotter sa Police Station 1 ang isa ka pastor batuk sa isa ka empleyado sang ciudad matapos ini siya ang ginhambalan nga G-A-G-O.
Si Pastor Wennie Estares, 50 anyos ang edad, kasado kag pumuluyo sang Menlo Village, Brgy. Zone 12, Talisay City ang nagreklamo sa pulis nga ini siya ang ginhambalan nga g-a-g-o sang empleyado sang General Services Office ukon GSO.
Ang ginreklamo nakilala naman kay George Paguio, legal ang edad kag empleyado sang GSO nga assigned bilang plaza guard sang Bacolod city public plaza.
Suno kay Pastor Wennie nga mga las 2 kahapon sang hapon samtang nga ini siya ang naga-wali kag naga debate sa sulod sang plaza, hinali na lamang nga nagsinggitan ang empleyado sang mga tinaga nga: “ kon ako mag-debate sa imo, ipakita ko sa imo ang pagka-gago mo.”
Suno kay Pastor Wennie nga iya ini ginsabat nga “ ano problema kon gago ko,” apang nagsabat pa gid balik si George nga “ ti gago ka gali?”
Ginreklamo sang pastor nga nahuy-an siya bangud makapila pa ka beses nga ginsulit-sulit sang plaza guard ang tinaga nga g-a-g-o./dyHB BACOLOD
