Nabas, Aklan — Una eon sa advance state of decomposition rong patay nga eawas tag makit-an kahapon sa Linao River, Sitio Putol, Laserna, Nabas, Aklan.
Ro patay nakilaea kay Roman Joseph Montoya, 30-anyos ag residente man it nasambit nga lugar.
Suno kay PO1 Andrew Andrade, nabaton nanda rong report pinaagi kay Punong Barangay Jonifer Flores it nasambit nga barangay ag insigida man nanda gin respondihan ag nakita rong patay nga naga eotaw sa suba, naka short ag uwa it eambong.
Sa inisyal nga imbestigasyon naga guwa nga rayang patay hay nakita ko magmanghod nga sanday Edison ag Ryan Santillan mga 9:45 it agahon kahapon ag insigida gin report kay PB Flores.
Eagi man nga nagpangayo it assistance rong Nabas PNP sa MDRRMO Nabas ag Philippine Coastguard dahil sa kabaskogon rong sueog ag madaeom ro tubi.
Mga ala 1:30 it hapon dayunan nga nahapatakas rong patay nga eawas halin sa suba ag nakitaan raya it daywa ka mga nina sa anang ueo nga indi pa madetirmina kon tama it alin nga bagay.
Nasayuran nga rayang si Montoya hay naga trabaho sa isla it Boracay ag una imaw naga dayon sa baeay ko anang tiyo ag tiya sa Laserna, Nabas pero pasoepot-soepot eamang.
Ulihi imaw nga nakita ko Lunes matapos nga mag-eaong sa anang tiya nga maga adto sa sangka namatyan para magbulig ag uwa eon naka uli.
Sa makaron hay nag request pa rong Nabas MPS it SOCO para mag conduct it dugang nga imbestigasyon para ma determina kon may foul play ag kon ano gid ro gintunaan ko anang kamatayon.
