Nakit-an na karong alas sais sa buntag ang patayng lawas sa 15 anyos nga estudyante nga naanod sa dihang motabok unta sa suba niadtong Sabado sa hapon.
Ang biktimang si Mark Joseph Pajam, Grade 7 ug taga Barangay Carmen ning syudad sa Cagayan de Oro ang nakit-an sa sekyu sa city hall nga naglutaw sa suba duol sa duaw park.
Giila ang biktima pinaagi sa iyang inahan nga si Richel Pactain.
Matud sa inahan nga nilakaw ang iyang anak niadtong Biyernes sa gabie nga wala nananghid kay dili nila gatugutan ug wala na makauli niadtong Sabado.
Samtang padayon pang gipangita karon ang 12 anyos nga si alyas Miggy nga taga Calaanan, Barangay Canitoan nga kauban ni Pajam nga naanod sa suba sa Tambo, Macasandig niadtong Sabado.
Mahinumduman usab nga siyam sila ka managhigala ang nangaligo sa suba ug misulay sa pagtabok gikan sa Tambo, Macasandig paingon unta sa Barangay Carmen nga area sa dihang naanod ang duha ug gipangita sa Oro Rescue.
