Anaa na sa state of decomposition nga nakit-an ang patay sa usa ka lalaki sa lawod sa Barangay Macabalan mga alas sais karong buntag.
Personal usab nga giila nilang Gloria ug Juanito Espillogo ang biktima nga si Jeffry Espillogo, 27 anyos nga taga Barangay Balulang ning syudad.
Matud ni Gloria ug Juanito nga si Jeffry ilang ikaduhang anak, kinsa unang nawala sa ilang balay sa Balulang niadtong Sabado.
Apan nakit-an na lamang kini sa usa ka mananagat nga naglutaw-lutaw sa barangay Macabalan kaganinang buntag, busa iya kining giguyod ug gihikot sa bato daplin sa accretion area sa Macabalan ug nakit-an kini sa mga residente daplin sa baybay sa maong barangay.
Matud ni Gloria ug Juanito, nga adunay sakit sa pangisip ang ilang anak nga anaa sa 2nd year high school sa Balulang National High School.
Wala usab masayod ang magtiayon sa hinungdan nganong nakit-an na lamang ang ilang anak sa lawod sa Macabalan nga nagsuot na lamang sa brief.
Tungod niini, gidala sa kapolisan sa Macabalan sa Bollozos funeral homes ang patayng lawas sa biktima aron i-autopsy sa SOCO.
