Gikompirma ni Police Lt. Col. Mardy Hortillosa, ang tigpamaba sa COCPO nga duna nay derogatory record ang pulis nga nasikop kagahapong adlawa atol sa gipahigayong entrapment operation.
Matud ni Lt. Col. Hortillosa nga kini nagpasabot nga aduna nay nadawat nga mga reklamo batok sa maong pulis apan wala pay napasaka nga kaso batok kaniya.
Mahinumduman nga gipahigayon kagahapong adlawa ang usa ka joint entrapment operation nga gilangkoban sa Regional Intelligence Division, Counter Intelligence Section ug police station 1 divisoria sa usa ka food chain sa Velez St., batok kang Patrolwoman Sheryl Lou Licayan.
Kini human nangilkil ang maong pulis og kwarta balor tre mil pesos ngadto sa usa ka aplikante pagka Non Uniform Personnel.
Ka transact niini ang biktimam sulod sa maong fast food chain og dihang nadawat na ni patrolwoman Licayan ang kwarta, gipahigayon na ang pagsikop kaniya.
Sa kasamtangan, gi-imbestigahan pa sa kapulisan kung duna bay laing kauban ug duna bay laing kustomer ang suspect samtang gihan-ay na ang kasong robbery extortion batok kaniya.
Nasayran nga si Patrolwoman Licayan, ang napulo ka tuig na sa serbisyo sa Philippine National Police, kinsa na destino sa Regional Mobile Force, City Mobile Force, Police Station 8 Lumbia, Tourist Pulis, Police Station 2 Cogon ug Police Station 4 Carmen.
Dugang pa nga dihang gipahigayon ang entrapment operation, naka on leave si Patrolwoman Licayan ug nakatakdang mubalik sa serbisyo karong Hunyo 14.
Samtang, nagpahinumdom si Lt. Col. Hortillosa nga wala gitolerate ni COCPO OIC City Director, Col. Reynante Reyes ang mga pulis nga mangilkil og kwarta.
