Gikumpirmar ni Mario Pelisco ang Manager sa Philippine Charity Sweepstakes Office kon PCSO Bukidnon nga sa karon ilang gisunod ang kamanduan ni Presidente Rodrigo Duterte nga mao ang pagpasira sa mga lotto outlet sa ahensiya.
Apan matud ni Pelisco- ang lotto, apil na ang STL nga dula adunay mga kontrata sa ahensiya, hinungdan nga hangtud karon ilang gipaabot kung unsa gyud ang final decision niini.
Giklaro usab ni Pelisco nga nagpadayon ang ilang medical assistant program sa pagkakaron, apan kung walay kita o revenues ang ahensiya aron kini nga programa magpadayon mahunong kini sa dili madugay.
Nasayran nga gimugna ang PCSO alang sa medical nga panginahanglan sa katawhan.
Samtang aduna pay pondo nga nabilin ang PCSO aron nga itabang sa katawhan.
Matud ni Pelisco, adunay mga nandaug nga wala ma-claim ang ilang premyo sa rason nga nangawala ang ticket, nalabay o wala magtuo nga nakadaug ang ilang gitay-an nga numero.
Dugang pa niini, nga adunay usa ka tuig nga validity nga ihatag ang ahensiya aron makuha ang maong premyo, hinungdan nga kung kini dili makuha sa nakadaug, automatic kini nga mahatag sa charity nga pondo.
Kini unya ang gamiton sa ahensiya, isip dugang pondo aron gamiton sa pagtabang sa katawhan.
Apan gipasabot ni Pelisco nga luyo niini, dili mahimong magdugay ang pagpasira sa mga outlet, tungod kay dili usab mahimo nga dili mahurot ang ilang pondo.
