GIDASIG sa buhatan sa Provincial Governor’s Office- Provincial Disability Affairs Division (PGO-PDAD) sa pagpanguna ni Disability Officer IV Mr. Dominador D. Libayao ang mga kadagkuan sa munisipyo sa Impasug-ong, Bukidnon nga suportahan ang sektor sa Person’s with Disability (PWD) sa ilang munisipyo.
Kini ang nahimong mensahi ni Libayao sa gipahigayong Strengthening of Network and System for Persons with Disability Seminar diin sa tibouk probinsya sa Bukidnon, ang munisipyo lamang sa Impasug-ong ang wala pa nakatukod ug pederasyon sa ilang mga PWD’s.
Lakip nga gihisgutan sa maong kalihukan ang mga katungod ug benepisyo sa mga PWD’s, disability-related legal mandates, unsaon nga mamahimong epektibo nga self-advocate ang usa ka PWD, unsa ang mamahimong proseso sa pag-organisa sa ilang pederasyon, PWD profiling, unsaon sa pag-andam ug pagsulat sa mga resolution ug minutes sa ipahigayon niining mga meeting.
Ang lungsod sa Impasug-ong usa ka Seal of Good Local Governance (SGLG) Awardee sa milabay’ng mga katuigan diin kinahanglan niini nga ma-organisa ang ilang PWD Federation ug Municipal Disability Affairs Office (MDAO) gumikan kay usa na kini sa mga rekisitos nga gikinahanglan sa sunod nga ebalwasyon.
Hugot usab nga misuporta si Bukidnon Provincial Governor Jose Ma. R. Zubiri, Jr. sa mga kalihukan ug programa sa PDAD diin kini gigahinan sa probinsya ngadto sa 10 milyones ka pesos nga gikuha gikan sa budget sa gender and development (GAD).
Ang maong kalihukan gitambungan sa mga representante sa mga PWD’s sa 13 ka mga barangay sa Impasug-ong ug PWD Focal Person Lovely Antivo, diin kini gipahigayon didto sa Panika Hall, Tourism Center, Impasug-ong, Bukidnon kaniadtong Abril 8, 2021.
Kauban ni Libayao nga mamumulong si Disability Officer II Ms. Reissa Valerie M. Tahadlangit, Disability Affairs Assistant II Milikan V. Andam kauban silang Ms. Gina Castro ug Ms. Angelie de Asis.
