Nagmalampuson nga gipahigayon bag-uhay lang ang pinakauna nga Peace Partners Summit sa probinsya sa Sarangani adunay tema nga “Sulong sa Malinawong Kaugmaon.” Gituyo pagmugna sa Sulong Kapayapaan program ni Governor Steve Chiongbian Solon sa pagpanguna sa Provincial Social Welfare and Development Office katugbang ang DILG, AFP og PNP.
Pwede usab kining tawagon nga former rebel summit tungod kay gitagana kini nga panagtigum, nilungtad og duha (2) ka adlaw sulod sa Capitol Gymnasium, alang sa mga kanhing rebelde nga malinawon ng nibalik sa sabakan sa gobyerno og nanginabuhing normal kauban ang ilang mga pamilya.
Walay laing gibuhat ang gatusan ka mga partisipanteng rebel returnee, kalalakihan og kababaihan, kundili nga naminaw sa mga pagpasabot gikan sa baynte-singko (25) kabuok lokal og nasyonal nga ahensya sa gobyerno aron hingpit nilang madawat ang mga benipisyo og kaayuhan nga giandam kanila sa panggamhanan ni Pangulong Rodrigo Duterte ilalum sa E-CLIP kon Enhanced Comprehensive Local Integration Program og sa mga local initiative.
