BACOLOD CITY – Duha na naman ka mga soltero ang naintu-an sang isa ka lalaki nga nagpakuno kuno nagapang recruit sang trabahante para sa isa ka daku nga mall diri sa Bacolod kagab-i sa dalan San Juan, Brgy. 12 Bacolod City.
Nakilala ang mga biktima nga sanday Kris Rey dela Rosa, 23 anyos ang edad, kag Jose Numfer Mahinay, 21 anyos ang edad, lunsay soltero kag pumuluyo sang Brgy. Zone 5, Cadiz City.
Suno sa duha ka mga biktima nga ini sila ang nagpadulong sa isa ka manokan sa San Juan Street mga las 10 kahapon sang aga.
Didto kag ila gin-meet ang suspek nga si Kirk Fernadez, 30 anyos kag pumuluyo sang Brgy. Daga, Cadiz City nga nagpangako sa ila nga pasudlon sila sa trabaho sa isa ka daku nga mall diri sa ciudad.
Ginpahayag sang mga biktima nga ila gintugyan sa suspek ang ila mga gamit kag kwarta nga kapin sa P5 mil pesos kabaylo sang ginpangako nga hatagan sila sang ID para gilayon sila nga makasugod sang training.
Apang nakalipas lang ang pila ka oras, wala gid nakabalik si Kirk Fernandez gani nagpadulong na lamang sa Police Station 1 ang amo nga mga biktima kag nagpa-blotter./dyHB BACOLOD
