Phil. Army wala na nakibot sa paghimutig sang NPA nga ila miembro ang apat ka naaresto sa syudad sang Kabankalan

22

Wala na nakibot ang Philippine Army sa paghimutig sang New People’s Army (NPA) nga ila miembro ang apat ka mga naaresto sa Purok Mapuso, Brgy. Magballo, Kabankalan nagligad nga Hulyo 10 sang gab-i.

Sa interview sang DYHB kay Lt. Colonel Erwin Cariño, commander sang 15th Infantry Battalion (IB), ginpahayag sini nga normal na nga ipanginwala sang NPA nga ila miembro ang apat, apang suno sa iya may mga dokumento kag mismo mga anay upod sang mga ini ang nagkumpirmar sa ila sang impormasyon.


Nahibaluan nga sa statement sang Regional Spokesperson sang Apolinario Gatmaitan Command New People’s Army-Negros Island, ila ginpahayag nga indi miembro sang NPA ang mga naaresto nga sanday Raffy Patajo alias Paolo, 21 anyos, sultero, farmer kag residente sang Sitio Montelo, Brgy. Pinggot, Ilog; Relyn Morino, alias Sam, 22, dalaga, sang Sitio Napudyot, Brgy.Orong, Kabankalan City; George Buga-ay, alias Samantha, 42, may asawa, sang Brgy. Punta Taytay, Bacolod City ngasecretary general sang Pamalakaya Negros kag Emmylo Tañares, alias Drey kag Maulyn, 38, dalaga, sang 137 South Poblacion, San Fernando, Cebu nga Liason Officer sang National Democratic Front (NDF) Cebu.

Madumduman nga nakuha sa mga suspek ang nanari-sari nga armas, bala, mga cellphone, subversive documents kag cash nga P119,000. Ginkumpirmar naman ni Cariño nga napasaka na ang kaso nga paglapas sa RA 10591 ukon “An Act Providing for a Comprehensive Law on Firearms and Ammunitions,” kag RA 9516 bangud sang iligal nga paghupot sang eksplusibo batok sa mga suspek.

[image: image.png]

Facebook Comments