Pila sa gihapon ka mga pamatan-on ang ginsapupo sang mga barangay Tanod kag Barangay Officials matapos madakpan nga yara sa guwa sang ila puluy-an sa dis-oras sang kagab-ihon.
Ini angut sa padayon nga pagpatuman sang hugot sang ordinansa natuhoy sa curfew for minors.
Ginpahayag ni Police Sr. Inspector Shella Mae Sangrines, spokesperson sang Iloilo City Police Office nga tatlo ka pamatan-on nga mga lalaki nga yara sa computeran ang ginsapupo sini lang nga gab-i sang mga barangay Tanod sang Sooc, Arevalo kag ginturn-over ang mga ini sa WCPD sang Arevalo Police Station.
Samtang, apat man ka babaye nga pamatan-on ang ginsapupo sang mga Barangay Officials sang Barangay Airport, Mandurriao kag ginturn-over sa Mandurriao Police station.
Ginpasalamatan sang hugot sang WCPD-ICPO ang aktibo nga pagbantay kag pag-ronda sang mga Opisyales kag mga Tanod sa nasambit nga mga barangay.
