CALATRAVA – Padayon nga ginapangita sang kapulisan ang 21 anyos nga si John Mark Melebo, matapos sini nga ginpamatay ang iya tatlo ka mga manghod sa Upper Pala-pala, Barangay Marcelo, banwa sang Calatrava las 12:30 kahapon sang udto.
Ang suspetsado nga armado sang ‘plamingko’ sa diin ang iya pinangpatay nga manghod amo sanday Gregor, isa ka tuig, Alejandro, 5 anyos kag Jhonrenz, 14 anyos.
Suno sa imbestigasyon sang mga kapulisan, gingutrab sang magulang ang liog sang iya mga manghod gamit ang plamingko samtang nagakatulog sang nagpauli ini, wala sila nakahanda sang panyagahon matapos nga kapoy ini nga nagtrabaho halin sa kampo.
Maswerte naman nga nakapalagyo ang manghod sini nga babayi nga si Jenny Rose, 9 anyos, nga amo ang nagkapanugid kag nagpangayo sang bulig sa ila mga kaingod.
Suno naman kay Kapitan Jeremias Diotay, nga ang suspetsado ang nagabatyag sang nervous breakdown kag naghingyo pa ini sa iya mga ginikanan nga mag-eskwela sini nga bulan sang Hunyo apang bangud sa kapigaduhon wala ini nakapa enrol.
Ang iloy nila ang nagatrabaho sa Manila nga natalana nga magapauli subong nga adlaw samtang ang ila amay nagtambong sa PTCA meeting sa Marcelo Elementary School sa amu tion.
