Gikumpirmar sa Armed Forces of the Philippines nga adunay pipila ka Imam ang nalambigit sa violent extremism teaching nga adunay kalambigitan sa grupong Maute-ISIS nga na-engkwentro sa tropa sa gobyerno sa Marawi City, Lanao del Sur.
Matud ni Joint Task Force Ranao Deputy Commander Col. Romeo Brawner Jr. nga kasagaran sa mga Imam nga nagpaluyo sa extremism teaching ang gikan matud pa sa maong lungsod.
Dugang pa ni Brawner nga kini ang gibulgar sa mga surrenderees sa Maute-ISIS ug pipila ka residente nga adunay pipila ka Imam ang hilom nga nagpakusog sa pagtuong violent extremism.
Tungod niini, dili lamang sa Lanao del Sur ang ilang gihimong pagmonitor kon dili lakip na ang ubang lugar sa nasud.
Gibutyag usab ni Brawner nga mangayo sila og tabang sa ubang elder religious leaders sa Islam aron mapugngan ang pagkaylap sa violent extremism nga mugna sa mga teroristang Islamic State of Iraq and Syria gikan sa Middle East.
Matud pa nga moabot sa 70-mil pesos ang gaibayad sa grupong ISIS ngadto sa mga ginikanan sa matag child warrior recruit kung mopaubos ang ilang anak sa training batok sa militar.
Una nang gikabutyag sa militar nga moabot sa 200 ka mga child warriors ang na-recruit karon sa maong grupo nga giunhan ni Maute-ISIS Commander Owayda Benito Marahomsar alyas Abu Dar human kini makasibat gikan sa giilang most affected area sa Marawi City niadtong miaging tuig.
