Pipila ka internet café sa Brgy. Luna, Surigao City tagpahimangnuan nan kadagkuan sa PNP
Tagpahimangnuan nan kadagkuan sa Phil. National Police an pipila ka tag-ija ug staff nan lain-laing internet café sa Brgy. Luna, Surigao City ini human tagreklamo na bisan kon alas 10;00 sa gabii ug kaadlawon tagtugutan pa an mga menor de edad na maggamit sa computer.
Nangunay si Senior Inspector Dorothy Tumulak, an nanguyo sa Public Community Relations nan City PNP kaiban an kadagkuan sa PNP Women’s Section sa paglibot-libot ug nagpahimangno sa mga tag-ija kalabot sa City Ordinance sa operasyon sa internet café na tagdili an pagpaduwa sa online games o paggamit nan computer units ngadto sa mga kabataan kon panahon tingklase o ba kaha dis-oras na nan gabii.
Sa amo na operasyon, una na taghimo an Warning sa mga tag-ija ug staff sa internet café pero sa sunod na masakpan an mag-atubang na ini nan sanctions ug multa lakip an posibilidad na masirad-an an negosyo.
