Padayon karong nagpaayo sa Camp Evangelista Station Hospital ning syudad ang samaran nga tulo ka sundalo ug laing upat, human gibanggaan sa usa ka Isuzu Elf ang ilang gisakyang KM450 military vehicle sa probinsiya sa Bukidnon.
Nasayran nga unang gidala ang mga biktima sa hospital sa Brgy. Sinuda, Kitaotao, Bukidnon apan gumikan kay grabeng naangol ang tulo ka sundalo hinungdang gibalhin kini sa kampo.
Matud ni Bukidnon Provincial Police Office spokesperson Senior Insp. Jisselle Longgakit, nga naglakip sa mga samaran silang Corporal Hamsilani ug P-F-C Ortega ug Esmero.
Gibutyag usab sa maong opisyal, nga nag-unload og mga sundalo ang military vehicle nga gimaneho ni P-F-C Bryan Encarnacion dihang mibangga ang elf nga gimaneho usab ni Junvert Aninion nga taga-Digos City, Davao del Sur.
Gumikan sa insidente, naguba ang upat ka R4 rifles sa maong mga sundalo gumikan sa maong insidente. Tungod niini, nag-atubang sa kaso ang driver gumikan sa nahiagoman sa mga sundalo ug sa ilang mga dalang gamit. .
By; Radyoman Aiza Enloran and Ellah Baculio
