Roxas City, Capiz- Ginbaliwala lamang sang mga local telecommunication companies sa Pilipinas ang nangin tikang sang Estados Unidos nga ibutang sa blacklist ang Huawei technologies.
Matandaan nga gin-anunsyo ni US President Donald Trump nga ibawal na ang Huawei sa US market bangud naman sa trade tensions sa tunga sang US kag China.
Sa statement nga ginpaguha sang Philippine Long Distance Company o PLDT, ginpasiguro sini sa ila mga subscriber, PLDT man okun Smart nga ang magapabilin nga available ang mga Huawei handsets kag devices pinaage sa ila official channels.
Makig-angut man ang PLDT kag Smart sa Huawei para aksyonan ang mga concern nga may kaangtanan sa mga masunod nga firmware kag software updates sa mga phone, pocket Wi-Fi units kag iban pa nga mga devices.
Ang Globe telecom naman ang padayon nga naga-monitor sa sitwasyon.
Suno sa Globe, wala ini sang direkta nga epekto sa ila network services kag ginahulat nila ang analysis sang pila ka apektado nga kumpanya.
Gionapt-od naman sang Huawei sa Globe nga padayon ang paghatag sa ila sang security updates kag after-sales services sa mga device users nga naga-usar sang Globe network.
Sa subong, yara sa “wait and see” mode anay ang mga telco kasunod sang latest development.
Sa madumdoman, ginkaalarma sang mga Huawei phone users ang report nga pag-utod sang access sang Google kag Android sa isa sa “leading mobile phone manufacturers” sa kalibutan.
Ini ang bangud sa padayon nga pagkadalahig sang amo nga kompanya sa kontrobersiya angut sa gina-alegar pagpang-espiya.
