Ginpasiguro ni PNP chief Police General Oscar Albayalde nga indi mag-declare sang Martial Law si Pangulong Rodrigo Duterte sa Isla sang Negros.
Suno kay Albayalde, wala sang plano ang presidente nga ipaidalum sa Martial Law ang Negros Island sa atubang sang sunod sunod nga pinatyanay nga natabo sa Negros Oriental sang nagligad nga semana.
Base sa record sang Negros Oriental PNP, kapin 20 na ang nabiktima sang serye sang pagpamatay sa amo nga probinsya lakip na diri ang 4 ka pulis sa banwa sang Ayungon.
Apesar gin-ako sang NPA nga sila ang may kahimuan sang pagpatay sa Ayungon, ginsiling ni Albayalde nga sa gihapon nagapatigayon sang madalum nga imbestigasyon ang PNP kon ano nga grupo ang sa likod sang pinatyanay.
Angut sini, nagpadala na sang dugang nga pwersa ang PNP sa Isla sang Negros agud magbulig sulbar sa sunod sunod nga pagpamatay.
Pahayag sang PNP chief nga magabulilg ang Special Action Force sa lokal nga pulisya sa bahin sang anti criminality campaign kag internal security operations sa probinsya sang Negros Oriental kag Occidental.
[image: image.png]
