Mipresentar sa Sangguniang Panlalawigan ang mga kadagkuan sa Philippine National Red Cross- Bukidnon Chapter sa ilang plano nga magbutang ug RT-PCR COVID-19 Laboratory ug Blood Center dinhi sa Probinsya sa Bukidnon. Ang maong presentasyon gipangunahan ni Mr. Roderico Bioco- ang Board of Director sa Philippine Red Cross-Bukidnon Chapter.
Unang gipresentar ni Mr. Bioco ang kamahinungdanon sa pagbutang ug RT-PCR COVID-19 Laboratory dinhi sa Probinsya sa Bukidnon gumikan sa nagkadaghan nga ihap sa natapdan sa COVID-19 dili lamang sa atong nasud apan lakip na sa tibouk kalibutan. Matud pa niini nga kinahanglan nga andam ang atong probinsya sa pagtubag sa mga problema nga bunga sa maong pandemya.
Usa matud pa sa solusyon niini mao ang pagbutang ug Reverse Transcription Polymerase Chain Reaction o RT-PCR COVID-19 Laboratory gumikan kay mao kini ang girekomenda sa World Health Organization o WHO nga tukma ug masaligan ang resulta aron mailhan kung si kinsa ang nagdala sa maong virus ug mahimulag sa kadaghanan ug mahatagan ug medikal nga atensyon.
Importante niini matud pa ang mass testing ngadto sa katawhan aron mapabalik ang pagsalig sa mga katawhan nga magbukas ug negosyo ug mapabalik ang paglambo sa ekonomiya. Dinhi sa Bukidnon nga adunay populasyon nga 1.5 milyones ka tao, makahimo matud pa sa pag-testing ngadto sa 400 ka tao matag adlaw.
Lakip nga gipresenta ni Mr. Bioco ang Laboratory Set-up, PCR Molecular Lab Typical Staff Requirement, Lab components, Laboratory Layout, Operational Guide, Accreditation and Licensing, Construction, Training, ug daghan pang uban kung unsaon pagpadagan sa maong laboratory.
