Naglisod ang mga police investigators sa pag-ila kinsay suspek sa pag-ambush ni Police Supt. Michael Jonh Deloso mga alas 9:45 sa buntag niadtong Martes duol sa Misamis Oriental Capitol.
Matud ni Supt. Mardy Hortillosa, Spokesman sa Cagayan de Oro City Police Office o COCPO nga wala pay lead ang mga imbestigador kinsay suspek sa pag-ambush ni Supt. Deloso.
Gibutyag ni Hortillosa nga ang bonnet nga gigamit sa duha mga suspek nga nagsakay sa ilang Yamaha Mio motorcycle ang naghatag kalisod sa mga police investigators pagsulbad sa maong kaso.
“Nagmaskara man gud ang duha ka suspect, mao nang naglisod ta unsa-on nato sila pag-ila” matud ni Hortillosa.
Matud ni Hortillosa nga ang testimonya ra gayud ni Deloso ang gilauman sa mga imbestigador nga makatabang sa ilang imbestigasyon ug pag-ila sa duha ka hitman.
Wala pay idea si Hortillosa kon nakuhaan na ba o wala sa iyang statement si Deloso nga nagpabilin pang naka-confine sa ICU sa Northern Mindanao Medical Center.
Apan matud ni Hortillosa nga mintras wala pay tistigos ang mga imbestigador, apan duna nay ilang nahipos nga mga ebedensiya nga mahimong makatabang sa pagsulbad sa kasong pag-ambush ni Deloso ug pag-ila sa mga suspek.
“na-a na tay mga evidences nga atong gitahi-tahi karon para ma-identify nato ang suspek kay nakatabon man gud sila sa ilang dagway ang duha ka suspect” matud ni Hortillosa.
