Namatay sa edad nga 76 ang gitawag og Political Kingpin nga si kanhi mayor Vicente “Dongkoy” Emano sulod sa usa ka pribadong hospital dinhi sa Cagayan de Oro ganinang kadlawon.
Kini tungod sa sakit sa kasing-kasing.
Gidala gilayon ang patay’ng lawas sa kanhi mayor sa Cosmopolitan Funeral Home alang sa cremation.
Matud ni Misamis Oriental Gov. Bambi Emano, gikakurat sa ilang pamilya ang kamatayon sa iyang amahan ilabina nga nagpapili kini pagka-bise mayor dinhi sa siyudad.
Sa karon, wala pay plano ang kampo sa mga Emano kung kinsa ang mohulip sa iyang kandidatura.
Mahinumduman nga nagsilbi isip mayor sa Cagayan de Oro si Vicente “dongkoy” Yap Emano, sugod niadtong tuig 1998 hangtod 2007 ug subli kining nagsilbi niadtong 2010 hangtud 2013.
Nahimo usab kining mayor sa Tagoloan Misamis Oriental sugod 1980 hangtud 1983, nahimong gobernador sa probinsya sugod 1986 hangtud 1995 ug bise mayor dinhi sa Cagayan de Oro sugod 2007 hangtud 2010.
