Kapin sa 103,658 ka mga indibidwal ang mahimo maka-avail sang Social Amelioration Program (SAP) sa ciudad sang Bacolod.
Suno kay Department of Social Services and Development (DSSD) Head Pacita Tero nga subong nga adlaw (Abril 4) amat-amat na nila nga ginapanagtag ang mga pormas.
Gin-ako man ni Tero nga indi tanan sa Bacolod ang maka-avail sang SAP bangud santo sa ila projection, nagadangat sa 600,000 ang populasyon sa bug-os nga ciudad sang 2019.
Ini man ang rason kun nga-a nagapanawagan si Tero sa Department of Labor and Employment (DOLE) kag Department of Agriculture (DA) nga kun may yara sila sang kaangay nga programa sa idalom sang Bayanihan to Heal as One Act, hatagan nila ang indi madala sa SAP.
Maka-avail sang SAP ang mga yara sa poor ukon informal sector nga indi maka-income bangud sang ginapatuman nga Enhanced Community Quarantine kag may isa ka household member nga makabig vulnerable ukon disadvantaged kaangay sang Senior Citizens; Persons with Disability (PWD), Pregnant ukon lactating women; solo parents, Overseas Filipinos in Distress; underprivileged sector ukon homelss individuals kag informal economy workers.
Gin-athag naman ni Tero nga dapat ang barangay ang mag-survey sa ila residente kag ang DSSD na lang ang maga-validate sa nagakaigo nga hatagan sang P6,000 cash assistance sa idalom sang SAP.
