Hugot nga gihangyo sa konseho sa syudad si Presidente Rodrigo Duterte nga ma-appoint si Acting City Prosecutor Charisse Galarrita-Bitoon isip full-fledged city prosecutor sa Cagayan de Oro.
Kini human nasuta atol sa nagpadayong budget hearing nga hangtod sa kasamtangan acting capacity pa gihapon ang nagdumala sa buhatan sa City Prosecutor.
Sa Resolosyon nga gisagop sa konseho sa sesyon niadtong Lunes, gipasabot nga dako ang epekto sa performance sa opisina ang kakulangon sa permanenteng hepe.
Kini gawas pa nga ang usa ka officer in charge dili makahatag sa gikinahanglang stability ug malahutayong pagdumala sa buhatan.
Matud ni konsehal Ian Mark Nacaya, chairman sa komite sa pamalaod ug usa sa nagpaluyo sa gisagop nga resolosyon nga ang Cagayan de Oro usa ka highly urbanized city ug niini daghan ang mga kaso nga gipasaka dinha sa mga korte.
Busa angayan lamang nga matudlo na si Bitoon nga permanenteng city prosecutor sa syudad tungod kay dugay na usab kining nagsilbi isip fiscal ug pipila ka tuig nang natudlo nga officer in charge sa buhatan.
