Presidente Duterte, nangunay pagtaod sa promosyon pagka 2-star General sa commander sa Tabak Division

34

Mismong si Presidente Rodrigo Duterte and mitaod sa ikaduhang ranggo pagka-two star general ni Major General Roberto Ancan, ang commander sa 1st Infantry Division, Philippine Army, atol sa pagbisita sa presidente niadtong Hunyo 12, Miyerkoles, sulod headquarters sa 6th Infantry Battalion, sa Barangay Matling, Malabang, Lanao del Sur.

Ang presidente maoy nanguna sa pag-selebrar sa 121st Independence Day ug paghalad og bulak o wreath laying sa monumento ni kanhi chief justice Jose Abad Santos.


Ang 1st Infantry “Tabak” Division, nga nahimutang ang headquarters sa Labangan, Zamboanga del Sur, maoy adunay operational control sa Marawi City ug ubang bahin sa Lanao del Sur, gawas sa Malabang.

Si Ancan, kinsa membro sa Philippine Military Academy “Hinirang” Class of 1987, maoy ika-45 nga commander sa 1ID, hulip kang retired Major General Roseller Murillo niadtong Pebrero 2019.

Usa ka Airborne Ranger nga eksperto sa training, operations ug managerial acumen, si Ancan taga Victorias, Negros Occidental ug gradwado sa Master in Management Major in Public Management.

Si Ancan ang ikaduhang heneral  sa Army nga gitauran ni Duterte og second star rank sa Lanao del Sur sukad nahitabo ang Marawi siege sa 2017.

Sa iyang mensahe, miingon si Ancan nga usa ka dungog ug dakung prebilihiyo nga mismong ang presidente maoy magtaod sa promosyon sa iyang ranggo.

Iyang gisaad nga sa iyang liderato, ipadayun sa Tabak ang pagserbisyo sa publiko nga subay sa ilang gipanumpaang misyon.(RadyoMan Divina M. Suson)

Facebook Comments

From Advertisers