Patay sa shootout las 7 kaina sang aga ang ginatudlo prime suspect nga nagpatay sadtong Hunyo 18, 2019 sa apat ka mga police officers sa Negros Oriental.
Ginkilala ang suspetsado kay Ryan Sandag Manguilimutan, kilala man sa alyas nga “James” kag “Ka Ignacio.”
Ini siya ang gin-operate sang gintingob nga pwersa sang Philippine National Police – Special Action Force bilang lead unit, PNP Intelligence Group, Criminal Investigation and Detection Group, National Capital Region Police Office kag Negros Oriental Police Provincial Office.
Si Manguilimutan ang subject sang siyam tanan ka mga criminal cases may kaangtanan sa murder, theft kag paglapas sa International Humanitarian Law.
Suno sa pulis, gin-recruit sadtong 2013 si Manguilimutan sang rebelde nga grupo sa Northern Negros Front, Komiteng Rehiyon Negros/Cebu/Bohol/Siquijor (KR-NCBS).
Tuig 2016 sang ini siya ang gin-transfer sa Regional Strike Force sang KR-NCBS kag nangin regular member sadtong Enero 2018.
Na-recover sang mga otoridad kay Manguilimutan ang isa ka Canik Pistol nga gin-issue sa isa sa mga ginpatay nga pulis, tatlo ka magazne nga may live ammunitions, 39 ammunitions sang 9mm, brown nga sling bag nga may personal nga mga gamit kag apat ka empty shells sang 9mm.
Matandaan nga sadtong Hunyo 18, 2019 sang brutal nga ginpatay sang mga rebel groups ang apat ka mga pulis sa Sitio Yamot, Barangay Mabato, banwa sang Ayungon, Negros Oriental.
Ginkilala ang mga ini nga sanday Police Cpl. Releber Beronio, Patrolman Raffy Callo, Patrolman Roel Cabellon kag Patrolman Marquino de Leon.
[image: image.png]
