Sa pamahayag ni Ma. Evangeline Non, Provincial Statistician, OIC sa PSA-Bukidnon atol sa interview sa RMN Malaybalay, gibutyag niini nga wala na sa entiro probinsya ang mga personahe sa buhatan nga maghatag og assistance alang sa mga gusto magparehistro sa Philippine ID ug gitutukan nalang ang pipila ka mga priority areas kon mga lugar nga ubos ang ihap sa mga narehistro.
Lakip sa mga priority areas sa probinsya ang munisipyo sa Baungon, Don Carlos, Impasug-ong, Lantapan, Libona, ug Malaybalay City. Apil usab ang lungsod sa Manolo Fortich, Maramag, Pangantucan, Quezon, San Fernando, Talakag, ug Valencia City.
Dugang pa ni Non nga nakab-ot sa buhatan ang target sa mga narehistro sa milabayng tuig maong ang ubang mga kits nga gigamit sa tagsa-tagsa ka mga munisipyo gipangdala sa mga kasigbit nga probinsya aron nga matutukan usab ang pagpangrehistro sa ilang mga katawhan.
Apan mapasaligon usab si Non sa katawhan ilabi na sa mga munisipyo nga wala nahilakip sa mga priority areas nga mubalik gayud ang buhatan sa ilang mga lugar alang sa pagpahigayon og rehistro hangtud nga makab-ot ang target sa maong programa.
