BAGO CITY, NEGROS OCCIDENTAL – Nagpahayag karon sang pagduda ang pamilya sang inmate nga napatay sa sulod mismo sang Bago City BJMP sa motibo kag matuod-utod nga natabo sa ila himata.
Ang inmate nga si Reneboy Alvarez, 34 anyos ang edad, single kag pumuluyo sang Brgy. 4, Himamaylan City ang ginaalegar napatay matapos nga ini siya ang ginpulihan sang kaangay man niya nga mga priso sa sulod mismo sang Bago BJMP sadtong nagligad nga Huwebes, January 18 pasado las dos.
Suno sa tiyo sang biktima nga si Bongbong Alvarez nga natingala sila nga kon ginpulihan gid man sa sulod sang karsel ang ila himata, nga-a napuno sang lunang ang iya sini panapton kag may mga nagatapik pa nga hilamon sa iya lawas sang ini ang gindala sa Bago City District Hospital.
Sa bahin sang Bago City BJMP, ginpahayag ni Jail Warden, Jail S/Insp. Alex Sy nga sa iya kapasidad bilang head sang amo nga facility, gilayon niya nga ginpabalo ang Regional Investigation Prosecution Division agud nga makapatigayon sang immediate investigation sa amo nga hitabo.
Suno kay Sy, nagpadala naman ini sang communication sa Bago City PNP agud nga mag-conduct man sila sang parallel investigation sa kaso sang kamatayon sang isa nila ka inmate.
Ginklaro sang Jail Warden nga masabat gid lamang ang pamangkot sang pamilya ni Reneboy kon ngaa napuno sang lunang kag hilamon ang lawas sang priso sa tion nga matapos na ang imbestigasyon.
Apang ginpahayag ni Sy nga base sa iya initial investigation, antes pa man nakasulod si Reneboy sa Selda 6 iya sini naka enkwentro ang coordinator kon diin siya nag una nga nagtiklod diri rason nga ginpulihan ini sang mga naka-kita nga mga priso.
Matapos ang pagkastigo, gindala ini sa ila office kag ginpa check sa ila nga Jail Nurse sa diin nagparisir pa si Alvarez nga magbalik sa Selda 6.
Pila lang minutos ang nakalipas ginpabalo sila nga naglain ang pamatyag ni Alvarez sa diin didto na nga nagdesisyon sila nga dal-on sa ospital pasado las kwatro.
Kon ngaa nga damo ini sang lutak kag hilamon, ini bangod nga nagcollapse siya samtang paguwa sa prisuhan sa diin natumba ini sa ila garden.
Nahibaluan nga si Reneboy ang gintransfer sa Bago BJMP halin sa Himamaylan BJMP kon diin halos 10 ka tuig na ini nga nabilanggo didto bangud man sang kaso nga illegal possession of firearms.
Wala labot sa Himamaylan BJMP, na-detain naman si Reneboy sa Kabankalan BJMP, BJMP Taculing, apang masami man nga ginasaylo bangud ini ang gina-petisyunan sang mga kaangay niya nga priso bangud sang indi niya sini maagwanta nga batasan.
Sa interview sa isa ka priso nga upod sadto ni Rene Boy sa Taculing, iya ginpahayag nga may isa man ka priso nga iya nabun-an sang bulang apang maswerte nga nakaluwas. /dyHB BACOLOD
