Liwat naman nga ginpaidalom sa boarder lockdown ang bug-os nga Probinsya sang South Cotabato umpisa kahapon tubtub Setyembre kinse (15) subong nga tuig, ini matapos nagpagwa sang panibag-o nga Executive Order number 52 si South Cotabato Governor Reynaldo Tamayo Jr. nga nagpalawig sang implementasyon sang Modified General Community Quarantine ukon MGCQ kag pagpaidalom sa boarder lockdown ang bug-os nga probinsya.
Nakabalhag suno pa sa EO 52 nga ginadumilian na ang pagsulod sa Probinsya kun wala sang madalom nga rason.
Apang pahanugutan lamang ang mga delivery sang essential goods, food stuff, medica, peace and order, rescue, media, covid 19 prevention intervention, civil servant, public utilities kag ang nagakinahanglan sang nagakaigo nga medical intervention.
Ginaabisuhan naman ang mga medical personnel kag essential worker nga nagatrabaho sa gwa sang Probinsya nga magpangita anay sang temporaryo nga puluy-an kun diin sila nagatrabaho bangud ipaidalom ini sa 14 days quarantine kun magbalik sa probinsya.
Samtang suspendido naman ang public transport nga magbyahe sa gwa sang probinsya.
Gina-obliga naman ang tanan nga magsuksuk sang facemask kag faceshield sa tion nga magwa sa ila sini panimalay.
