Gituki sa hawanan sa Sangguniang Panlalawigan ang mga nag-unang nasinati nga mga problema sa mga water district sa Probinsya sa Bukidnon.
Nitambong ang mga manager ug representante sa water district sa 20 ka lungsod ug 2 ka syudad ning Probinsya sa Bukidnon pinaagi sa imbistasyon ni PCL Ex-Officio Board Member Atty. Oliver Owen Garcia.
Matud pa sa mga managers nga kasagaran nga nag-una sa mga problema nga ilang nasinati sa ilang buhatan ang kakulangon sa source o suplay sa tubig, kakulangon sa mga pasilidad ug kagamitan, teknikal ug ang pundo para sa pagpadayon sa ilang mga programa sa patubig.
Usa sa mga problema niini ang kakulangon sa suplay sa tubig ilabi na sa panahon sa tag-init gumikan kay dili na kini makaabot sa mga kunsumante. Sa pamahayag ni IPMR Ex-Officio Board Member Richard D. Macas nga kinahanglan una kining masuta sa mga eksperto ug magpahigayon ug makuting pagtuon aron masiguro nga sustainable ang ipatuman nga proyekto sa patubig sa matag munisipyo ug syudad. Dugang usab niini nga usa nga nag-unang ugat hinungdan nga kulang ang suplay sa tubig gumikan sa nagkabag-ong klima o climate change. Gipamahayag usab niini nga dili lamang kita ang nakasinati sa kakulangon sa suplay sa tubig apan lakip na ang tibuok kalibutan. Gipasabot usab niini ang kamahinungdanon sa mga kahoy sa lasang nga maoy hinungdan sa ulan nga nag-unang suplay sa tubig.
Gisuportahan usab ni Gov. Zubiri ang pamahayag ni Board Member Macas diin matud pa sa gobernador nga usa sa maayong solusyon niini ang pagpaundang sa pagpamutol sa mga kahoy ilabi na sa mga multinational companies nga padayon ang expansion sa ilang mga plantasyon.
Dugang usab ni Gov. Zubiri nga kinahanglan panggaon ug alimahan nato ang atong kalasangan sa probinsya dili lamang alang kanato apan para sa umaabot nga henerasyon.
Gisugyot usab niini nga magmugna ug Provincial Water District nga naglangkob sa mga water district sa probinsya aron matabangan kini sa ilang mga kakulangon ug problema.
