Nagmalampuson ang gipahigayong proclamation rally sa partido PDP Laban senatorial candidates nga gipahigayon sa University of Science and Technology of Southern Philippines.
Mitambong sa rally ang lima ka mga kandidato pagka senador sa atong pangulo nga mao sila Dong Mangudadato, Ronald dela Rosa, Bong Go, Koko Pimentel ug Francis Tolentino o MABAGOKOTO diin nagpahayag sila sa ilang mga plata porma ngadto sa publiko.
Lakip usab sa mitambong ang ilang guest candidates sa ilang partido nga sila Ilocos Governor Imee Marcos, Senador Sonny Angara ug Former DILG Secretary Raffy Alunan diin naghatag pod og pag suporta sa atong pangulo.
Wala makatambong sa kalihukan ang laing tulo ka mga guest candidate nga silang kanhi Senador Pia Cayetano, Senador JV Ejercito ug Senador Cynthia villar.
Human sa mga mensahe sa mga kandidato pagka senador, mintras gihulat si Presidente Duterte mihatag una og mensahe si Mayor Oscar Moreno.
Pasado alas 9 miabot si Duterte ug didto iyang gipangbatikos ang mga nangalambigit sa druga, ang anaa sa oposisyon ang otso diritso, mga kadagkoan sa simbahang katoliko, ang mga human rights advocate ug ang iyang mga kritiko.
Human sa paghatag mensahe ni Presidente Duterte, gipasaka sa emcee ang mga kandidato sa lokal nga sakop sa Partido PDP nga gipangulohan ni Mayor Moreno alang sa picture taking, dayon gisundan kini sa mga kandidato sa Misamis Oriental ug mga kandidato sa partido sa mga kasikbit nga lalawigan sama sa Bukidnon, Iligan, Misamis Occidental ug uban pa.
Apan atol sa maong rally walay bisan usa ka kandidato sa lokal partikular na sa atong dakbayan nga gipataas ang kamot ni Pangulong Duterte diin mao kini ang gipaabot sa katawhan sa syudad nga kung kinsa ba gyod ang tinuod nga gipaluyohan sa Presidente.
