Indi pa dapat mangin kampante ang katawhan sang South Cotabato batok COVID-19, suno kay Provincial Health Officer Dr. Rogelio Aturdido Jr.,tungod nagagwa sa ila datos nga halin sa 1,221 sang Enero 1, naglab-ot na sa 1,362 ang COVID-19 cases sa probinsya sang Pebrero 3.
Suno kay Dr. Aturdido, buot silingon yara sa 141 ang nadugang sa naigo sang virus sa probinsya sa sulod lamang sang 34 ka adlaw nga pamatuod nga yara sa gihapon ang paandam sang COVID-19 sa South Cotabato amo nga indi dapat mangin kampante.
Ginhatagan pa punto ni Dr. Aturdido nga indi pa syento porsyento nga luwas sa COVID-19 ang probinsya.
Samtang, nakarekord naman ang IPHO sang 1,243 COVID-19 recovery, apang yara sa 34 ang ginbawian sang kabuhi tungod sa COVID 19 matapos nadugangan sang 7 ang 27 nga ila narekord sang Enero 1.
May-angot sini, nagalaum si Dr. Aturdido nga makaligad ang napulo ka bulan nga narekord ang COVID -19 cases sa probinsya nabutang na sa hunahuna sang publiko ang pagsunod sa mga minimum health protocols kapareho na lamang sang paghugas sang kamot, pagsuksok sang facemask ukon face shield kag pagsunod sa physical distancing.
Dapat idugang man suno sa iya para malikawan ang paglapta sang COVID-19 ang permanente nga bukas ang mga opisina ukon balay agud may-yara sang “air exchange.”
Pahanumdom man sini sa publiko nga seguraduhon nga tama ang mga impormasyon ang patihan tungod ang mali nga pagpati ang makapalala pa sang problema sa COVID-19.
