Sarangani Province–Malipayon karon ang mga organizer sa Provincial Musabaqah (mu-sa-ba-kah) sa Sarangani Province gipangunahan sa Madaris for Peace Program og sa Governor’s Commission on Muslim Affairs ni Governor Steve Chiongbian Solon, tungod kay malampuson kining nahuman kagahapong adlawa, adlaw nga Lunes, sulod sa tulo (3) ka adlaw nga aktibidad gipahigayon sa Kapitolyo sa Sarangani nagsugod atong adlaw nga Sabado kung diin sa labing unang higayon gidugok kini sa mga kabataang Moro itandi sa naglabay nga mga tuig.
May tema kini nga “BATANG MADARIS NG SARANGANI, IBA KA, UMANGAT KA.” Anaa sa tres mil (3) kabataang Muslim ang nagtungha sa 49 ka Madrasah o Madaris Arabic school sa tibuok probinsya sa Sarangani, og ang nitambong sa maong Provincial Musabaqah ang niabot pud og 2,500 kabuok.
Musabaqah, pinulungang Arabic nagpasabot nga Intramurals. Dili ra sports ang anaa kundili anaa puy academics sama na lang sa quiz bee gikan sa mga natun-an sa Qur’an, og ang bag-ong gi-offer karong tuiga nga storytelling nga gipasiugdahan sa Moro women leaders.
Walay laing tumong si Governor Solon sa pag-organisa sa maong tinuig nga aktibidad kundili nga magkahugpong ang mga kabataang Moro nga nag-eskwela sa mga Madrasah og ang makanunayon nga pagpahinumdom kanila nga kinahanglang higugmaon ang kalinaw aron maanaa pirme ang kahapsayan sa panginabuhi og kalambuan sa Sarangani og nasud Pilipinas.
Ginahisgutan pud sa Musabaqah ang kamahinungdanon sa edukasyon og ang pag-respeto sa mga ginikanan og katigulangan.
