General Santos City—Gibutyag ni Atty. Arnel Zapatos, City Administrator sa Gensan nga dungan sa pagbalik sa operasyon sa mga public utility vehicle, nagpagawas ug kamaduan ang Regional IATF nga kinahanglang point to point kon terminal to terminal ang byahe sa mga bus ug van.
Matud niini, subay sa resolusyon sa Regional IATF, adunay silyo nga ibutang sa mga public utility vehicle aron masegurong walay mosakay o monaug nga pasahero sa dili terminal o point of destination.
Apan nauna na matud pang nasabutan sa local IATF sa Gensan ang maong silyo ang gub-on pag-abot sa border checkpoint pasulod sa Gensan tungod kinahanglang sutaon ang mga qr code sa mga pasahero.
Kalabot niini, gibutyag ni Atty. Zapatos nga ang mga APOR kon Authorized Person Outside Residence nga pwedeng mugawas ug sulod sa Gensan.
Apan kinahanglan nga adunay dala o i-presentang QR code alang sa contact tracing.
Samtang ang mga LSI nga musulod sa Gensan hilabina ang mag-by land, pareho gihapon ang proseso sa pagsulod, kinahanglang mag-coordinate sa LGU ug mupa-ilalom sa quarantine.(LVR)
