Kalibo, Aklan – Kulong rong sangka pulis matapos nga makasagi it daywa ka mga mineor de edad nga estudyante samtang raya hay nagatabok sa pedestrian lane kahapon sa Brgy. Estancia, Kalibo, Aklan.
Ro nasambit nga pulis hay nakilaea kay Police Staff Sergeant Erwin Perez ag naka assign sa Aklan Police Provincial Office (APPO).
Sa imbestigasyon it Kalibo PNP naga guwa nga rayang si Perez hay naga maneho it anang saeakyan halin sa direksyon it Banga paadto sa Poblacion Kalibo tag ana karang masagi ro daywa ka minor de edad nga nagapang edaron it 12 ag 14 anyos samtang naga tabok sa pedestrian lane.
Insigida nga gindaea ro mga biktima sa Panay Health Care para sa nagakaigo nga pagbueong.
Suno kay Perez uwa nana mapan-uhi ro daywa ka unga bangud nga idto anang atensyon sa traffic enforcer.
Pursigido man rong pamilya it mga biktima nga magpasaka it kaso kuntra sa pulis apisar nga raya hay nagpangayo it pasensya nga posible makarong adlaw iga file.
