Davao City – Patay ang usa ka drug pusher human giingong misukol sa kapulisan atol sa gilusad nga buy-bust operation sa may Purok Uno, Matina Gravahan ning siyudad alas-11:00 kagabii.
Dead on arrival sa Southern Philippines Medical Center (SPMC) ang suspek nga giilang si Bryan Degmasa, hingkod ang edad, ug nagpuyo sa mao nga dapit human nakahiagom og samad-pinusilan sa iyang lawas.
Nasayran nga mibunot og pistol ang suspek dayon pusil dihang namatikdan ani nga pulis diay ang mipalit og droga kaniya apan abtik nakabawos ang mga otoridad og pabuto.
Gisuwayan pa sa mga operatiba pagsapupo si Degmasa paingon sa ospital aron masalbar apan sa dalan pa lang nakabsan na sa kinabuhi ang suspek.
Si Degmasa giila nga leader sa usa ka grupo sa Cavite kansang responsable sa mga akyat-bahay nga insidente ug nagapamaligya og droga sa ilang dapit.
Giingon kini usab ang mikulata sa usa ka tawo nga nakuhaan og video sa usa ka netizen niadtong nangligad nga mga adlaw.
Taud-taod usab gipailawom sa surveillance ang napatay nga drug pusher diin ang patay’ng lawas niini naa karon sa morgue sa SPMC.
RadyoMaN Joel Viray
